ဖြတ်လျှောက်အမြှောက်စာအဖြစ်ကူးပြောင်းပြီးနောက်အားလုံးရဲ့အချစ်ခံအလှလေးဖြစ်လာတယ်

[နိဒါန်း]

နဥ်စုန့်တစ်ယောက် ဂုဏ်သတင်းကြီးမားလှသော အထက်တန်းစား ယောက်ျားလေးကျောင်းတော်ကြီးဆီသို့ ကူးပြောင်းရောက်ရှိသွားခဲ့လေသည်။

လူတိုင်းသိကြသည့်အတိုင်း BL ဝတ္ထုကမ္ဘာထဲတွင်ဆိုလျှင် ဤသို့သော အထက်တန်းစား ယောက်ျားလေးကျောင်းများသည် အချစ်ဇာတ်လမ်းတို့ ပေါက်ဖွားရာမြေ ဖြစ်ပေသည်။

ရေတွက်၍မကုန်နိုင်သော အချစ်ဇာတ်လမ်းများထဲမှ ဇာတ်လိုက်ကျော်များ ဝန်းရံခြင်းခံထားရပြီး ချစ်ခြင်းမေတ္တာ လေပွေမုန်တိုင်းကြားတွင် သူ ပိတ်မိနေခဲ့တော့သည်။

ဥပမာဆိုရသော် ကျောင်း၏ လူမှုပိရမစ် ထိပ်ဆုံးတွင် ရပ်တည်နေသူ ဖူယွီ။ သူသည် ယာဉ်မောင်းပါသော Rolls-Royce ကားကြီးဖြင့် အကြိုအပို့လုပ်ခံရသူ၊ အတန်းထဲတွင် အဆင့်တစ် ချိတ်သူ၊ ရပ်ဘီအားကစားအသင်း၏ ခေါင်းဆောင်၊ ခါးသိမ်သိမ်နှင့် မန်ဂါဇာတ်ကောင်ကဲ့သို့ ခန္ဓာကိုယ်အချိုးအစားကို ပိုင်ဆိုင်ထားသူ ဖြစ်သော်လည်း အေးစက်တည်ငြိမ်ပြီး စကားနည်းကာ အမြဲတစေ တစ်ယောက်တည်းနေတတ်သူဖြစ်သည်။

ထို့ပြင် စီးပွားရေးအင်ပါယာကြီးကို ဆက်ခံမည့်သူ ရှန့်ယန်းလည်း ရှိသေးသည်။ သူသည် ကြွယ်ဝချမ်းသာလွန်းလှသဖြင့် ကျောင်းဆောင်တစ်ဆောင်လုံးကိုပင် လှူဒါန်းထားသူ ဖြစ်၏။ ကပြားအလှတရားကို ပိုင်ဆိုင်ထားပြီး သဘောကျနှစ်သစ်သူ ပရိသတ်အများအပြားရှိသည့် ပြိုင်ဘက်ကင်း အိုင်ဒေါတစ်ဦးလည်း ဖြစ်သည်။

ထို့နောက် ကျောင်းသားတိုင်း ကြောက်ရွံ့ရသည့် ကျောင်းလူဆိုး လီယို။ သူသည် မည်သူကမျှ ကြိုးတပ်၍ မရနိုင်သော ခွေးရိုင်းတစ်ကောင်ကဲ့သို့ ပုန်ကန်လိုစိတ်ပြင်းထန်ပြီး အထိန်းအကွပ်မဲ့သည့် ဆွဲဆောင်မှုမျိုး ရှိသူဖြစ်၏။

နောက်တစ်ဦးမှာ ဖြူစင်နူးညံ့သည့် ရုပ်သွင်ရှိသော ကျောင်းသားသမဂ္ဂ ဥက္ကဋ္ဌ ရှန်လင့်စစ်။ မျက်မှန်တပ်ထားတတ်ပြီး ယောက်ျားသားတိုင်း၏ ရင်ထဲမှ လရောင်ဖြူလေးသဖွယ် လူချစ်လူခင် အလွန်ပေါများသူ ဖြစ်သည်။

ယင်းတင်မကသေး။ ဥဒေါင်းဖိုကြီးသဖွယ် လူတိုင်းကို နှာခေါင်းရှုံ့တတ်သော မောက်မာသည့် ဒုဥက္ကဋ္ဌ၊ သာမန်လူများအား အနိုင်ကျင့်ရသည်ကို နှစ်သက်သည့် စိတ်ထားဆိုးရွားသော ဒုတိယမျိုးဆက် သူဌေးသား၊ အချစ်ကို ရှုတ်ချတတ်သော လူရှုပ်လူပွေ၊ စာကိုသာ တိတ်တဆိတ် ကြိုးစားလေ့လာတတ်သော အတန်းခေါင်းဆောင်၊ အရပ်ရှည်ရှည် ကြေးညိုရောင်အသားအရေနှင့် ကြွက်သားအဖုအထစ်များ ရှိသော အားကစားသမားနှင့် ဆွဲဆောင်မှု အားပြင်းသော အကသမားလေးတို့လည်း ရှိကြပေသေးသည်။

သူတို့အားလုံးသည် ချမ်းသာကြသည်။ ရုပ်ရည်ချောမောကြသည်။ ထို့အပြင် ဖြူစင်သော သို့မဟုတ် ရှုပ်ထွေးပွေလီသော လိင်တူအချစ်ဇာတ်လမ်းများတွင် ပါဝင်ပတ်သက်နေလေ့ ရှိကြသည်။ အားလုံးနီးပါးသည် BL ဇာတ်လိုက် ဖြစ်နိုင်သည့်သူများ ချည်းသာ။

သို့သော် ဤအရာများက နဥ်စုန့်နှင့် မည်သို့မျှ သက်ဆိုင်ပတ်သက်ခြင်း မရှိချေ။ သူသည်ကား ဆင်းရဲသားရပ်ကွက်မှ ရုပ်ရည်သာမန်သာရှိသော သာမန်လူတစ်ယောက်အဖြစ်၊ မရေမတွက်နိုင်သော BL ဝတ္ထုများထဲမှ အမြောက်စာဇာတ်ကောင်တစ်ခုအဖြစ် ကျောင်း၏ လူမှုပိရမစ် အောက်ခြေဆုံးသို့ ကူးပြောင်းရောက်ရှိလာခဲ့ခြင်း ဖြစ်သည်။ နေ့စဉ်နေ့တိုင်းလိုလို အချစ်ဇာတ်လမ်းအမျိုးမျိုးကို သူ ဖြတ်သန်းသွားလာ တွေ့မြင်နေရလေ့ရှိ၏။

ဥပမာဆိုရသော် နူးညံ့သိမ်မွေ့သော ကျောင်းသားသမဂ္ဂ ဥက္ကဋ္ဌနှင့် ဂိုဏ်းစတားအဖွဲ့တို့ ရန်ဖြစ်ကြသည့်အချိန်တွင် သူ ထိုနေရာ၌ ရှိနေခဲ့သည်။ ကျောင်း၏ အသည်းကျော် ရှန့်ယန်းက KTV တွင် နှာဘူးကြီးတစ်ယောက်ကို ထိုးကြိတ်ဆုံးမနေချိန်တွင်လည်း သူ ထိုနေရာ၌ ရှိနေခဲ့သည်။ ပုံမှန်အားဖြင့် တစ်ယောက်တည်းနေတတ်သော အတော်ဆုံးကျောင်းသား ဖူယွီ ပါတီပွဲတစ်ခုကို မမျှော်လင့်ဘဲ တက်ရောက်လာချိန်တွင်လည်း သူ ထိုနေရာ၌ ရှိနေခဲ့သည်။ ပုန်ကန်တတ်သော ကျောင်းလူဆိုးကြီး လီယို ပန်းဆိုင်၌ နှင်းဆီပန်းဝယ်နေချိန်တွင်လည်း သူ ထိုနေရာ၌ ရှိနေပြန်သည်သာ!

အခြားသူများက မေးကြသည် "...မင်းက ဘာလို့ နေရာတိုင်းမှာ အမြဲရှိနေရတာလဲ"

နဥ်စုန့် အသာအယာ ချောင်းဟန့်လိုက်ရင်း  "ကျွန်တော်က ဇာတ်လိုက်တွေနဲ့ မတော်တဆ ပခုံးချင်းတိုက်မိတဲ့ သာမန် ဖြတ်သွားဖြတ်လာ အမြောက်စာကောင်လေးပါပဲဗျာ”

သို့သော် လူပျိုဖော်ဝင်ချိန် ရောက်လာသည်နှင့်အမျှ သူ၏ အသားအရေသည် နေ့စဉ်နှင့်အမျှ ပိုမိုကောင်းမွန်လာသည်။ မျက်ဝန်းတို့သည် ပိုမိုလှပလာသည်။ အသားပိုဖြူလာပြီး ခန္ဓာကိုယ်အချိုးအစားလည်း ဖွံ့ဖြိုးလာခဲ့လေသည်။

SOS! အချစ်ပြိုင်ပွဲတွေ ပြည့်နှက်နေတဲ့ ဒီကျောင်းကြီးထဲမှာ ဒါက အရမ်းကို အန္တရာယ်များလွန်းတယ်!

ထို့ကြောင့် သူသည် သာမန်လူပုံစံ ပိုပေါက်စေရန် နေ့စဉ်နေ့တိုင်း ဦးနှောက်ခြောက်အောင် စဉ်းစားရတော့သည်၊ ယင်းမှာ အချိန်ပိုင်းအလုပ်တစ်ခု လုပ်တိုင်း အသွင်အမျိုးမျိုး ပြောင်းရသည်အထိပင်!

နွေရာသီကျောင်းပိတ်ရက် တစ်ရက်တွင်မူ လှိုင်းစီးကလပ်တစ်ခု၌ အချိန်ပိုင်းအလုပ်လုပ်နေသော နဥ်စုန့်ကို ရှာဖွေရန် သူ၏အတန်းဖော်များ ကမ်းခြေသို့ ရောက်လာခဲ့ကြသည်။

ထိုအချိန်တွင် ခြေတံရှည်ရှည်နှင့် ရေကူးဝတ်စုံ ဝတ်ဆင်ထားပြီး နေမင်းကြီးထက်ပင် တောက်ပသော အပြုံးပိုင်ရှင် ကောင်လေးတစ်ယောက်ကို သူတို့ မြင်တွေ့လိုက်ရလေသည်။

"မင်းက... နဥ်စုန့် လား" 

ထိုနွေရာသီတွင် သူသည် ကျောင်း၏ နံပါတ်တစ် အလှလေးအဖြစ် ပြောင်းလဲသွားခဲ့လေသည်။

တစ်ကျောင်းလုံး ပွက်လောရိုက်ကုန်တော့သည်!

1 Vs 1/ MC - နဥ်စုန့်